کیا وجوب نماز جمعہ میں سلطانِ عادل کا وجود ضروری ہے

کیا وجوب نماز جمعہ میں سلطانِ عادل کا وجود ضروری ہے

زرارہ سے مروی ہے کہ حضرت امام جعفر
صادق علیہ السلام نے نماز جمعہ کے لئے ہمیں اس قدر تاکید کی کہ میں نے سمجھا شاید
خود ہی پڑھائیں گے لہذا عرض گزار ہوا کہ ہم نماز جمعہ کے لئے حاضر ہوں گے تو آپ نے
فرمایا: میرا یہ مطلب نہیں کہ میں پڑھاؤں بلکہ میں تم کو تاکید کر رہا ہوں کہ اپنے
ہاں اس کو قائم کیا کرو۔

ایک روایت میں ہے امام محمد باقر علیہ
السلام نے راوی حدیث سے فرمایا کہ تم اللہ کی جانب سے واجب کئے جانے والے ایک
فریضہ کو ترک کرنے کی سزا میں ہلاک ہوجاؤ گے تو راوی نے عرض کی پھر ہم کیا کریں؟
آپ نے فرمایا نماز جمعہ پڑھا کرو۔

وجوبِ نماز جمعہ کی احادیث کو نقل کرنے
کے بعد شیخ محمد بن حسن المعروف شیخ حر عاملی اعلیٰ اللہ مقامہٗ تحریر فرماتے ہیں
کہ نماز جمعہ کے وجوب پر ان احادیث کے علاوہ قرآن مجید اور احادیثِ متواترہ کی
دلالت قائم ہے، جن کا عموم و اطلاق وجود سلطان عادل کی شرف کی نفی کرتا ہے۔ احادیث
میں لفظ امام وارد ہے اس سے مراد امام جماعت ہے (کیونکہ نماز جمعہ بغیر امام جماعت
کے نہیں ہوسکتی)۔ امام جماعت کے لئے بھی شرط ہے کہ دو خطبے پڑھنے میں آزاد ہو اور
اسے کسی کا خوف نہ ہو لہذا اس جگہ امام سے مراد عام ہے معصوم ہو یا امام جماعت اور
علماء نعت بھی یہی کہتے ہیں۔ آگے چل کر فرماتے ہیں کہ ان احادیث میں امام کا اطلاق
ایسا ہی ہے جس طرح نماز جنازہ، نماز استسقاء اور نماز آیات وغیرہ  میں جہاں جہاں نماز میں اقتداء کا بیان ہوتا ہے
بہرکیف ان احادیث سے یہ ثابت ہوتا ہے کہ نماز جمعہ میں جماعت شرط ہے اور وہ امام
کے بغیر نہیں ہوسکتی یعنی پیش نماز کے بغیر نہیں ہوسکتی۔

بہر کیف  زمانِ غیبت میں نماز جمعہ باقی شرائط کی
موجودگی میں بنیت وجوب پڑھی جائے گی اور شہید ثانی اعلیٰ اللہ مقامہٗ کی تحقیق کے
مطابق اگر اس کے وجوبِ عینی کی نفر پر علماء امامیہ کا اجماع قائم نہ ہوتا تو
وجوبِ عینی کا قول زیادہ قوی تھا لیکن اب کم از کم اس کو واجب تخییری کہنا چاہیے۔
یعنی نماز ظہر اور نماز جمعہ میں اختیار ہے اگرچہ نماز ظہر کے بجائے نماز جمعہ کا
پڑھنا افضل ہے اور جب نماز جمعہ با شرائط ادا ہوجائے تو احتیاطاً نماز ظہر پڑھنے
کی کوئی ضرورت نہیں ہے۔