Surah Taghabun PDF Read Online Translation Transliteration | سورة التغابن

اللہ کے نام سے جو رحمٰن و رحیم ہے (شروع کرتا ہوں) 

اللہ کی تسبیح کرتا ہے ہر وہ جو آسمانوں میں اور زمین میں ہے ملک صرف اسی کا ہے اور حمد صرف اسی کے لئے ہے اور وہ ہر شے پر قدرت رکھنے والا ہے ﴿١﴾وہ وہی ہے جس نے تم کو پیدا کیا پس بعض تم میں سے انکاری ہیں اور بعض ماننے والے ہیں اور جو کچھ تم کرتے ہو اللہ دیکھنے والا ہے ﴿٢﴾اس نے آسمانوں اور زمین کو حق کے ساتھ پیدا کیا اور تم کو شکل دی اور نہایت اچھی شکل میں بنایا اور اسی کی طرف بازگشت ہے ﴿٣﴾وہ جانتا ہے جو کچھ آسمانوں اور زمین میں ہے اور جانتا ہے جو کچھ تم چھپاتے اور ظاہر کرتے ہو اور اللہ دل کی باتوں کو جاننے والا ہے ﴿٤﴾کیا تمہارے پاس ان لوگوں کی خبر نہیں پہنچی جو پہلے کفر کر گزرے تو انہوں نے اپنے کئے کا مزہ چکھ لیا اور ان کے لئے درد ناک عذاب ہے ﴿٥﴾یہ اس لئے کہ ان کے پاس آتے تھے رسول واضح دلیلوں کے ساتھ تو کہتے تھے کہ کیا یہ انسان ہمیں ہدایت کرتے ہیں پس انکار کرتے اور منہ پھیر لیتے تھے اور اللہ بے نیاز ہے اور اللہ غنی اور لائق تعریف ہے ﴿٦﴾کافروں کا خیال ہے کہ انہیں اٹھایا نہیں جائے گا کہہ دیجئے ہاں خدا کی قسم تم ضرور اٹھائے جاؤ گے ساتھ اپنے عمل کے اور یہ بات اللہ پر آسان ہے ﴿٧﴾پس ایمان لاؤ اللہ پر اور اس کے رسول پر اور اس نور پر جو ہم نے اتارا اور اللہ تمہارے عمل سے خبردار ہے ﴿٨﴾جس دن تم کو جمع کرے گا جمع کے دن کے لئے وہ تغابن کا دن ہوگا اور جو شخص اللہ پر ایمان رکھے اور نیک عمل بجا لائے اس سے اس کی لغزشیں دُور کرے گا اور اس کو ایسے باغات میں داخل کرے گا جس کے نیچے نہریں بہتی ہوں گی وہ ان میں ہمیشہ رہنے والے ہوں گے یہ بڑی کامیابی ہے ﴿٩﴾اور جو لوگ کافر ہیں اور جھٹلایا انہوں نے ہماری آیات کو ایسے لوگ دوزخ کے مستحق ہیں کہ اس میں ہمیشہ رہیں گےاور وہ بُرا ٹھکانا ہے ﴿١٠﴾جو بھی تکلیف پہنچے وہ اللہ کے علم میں ہے اور جو شخص اللہ پر ایمان رکھے۔ اللہ اس کے دل کو سکون بخشتا ہے اور اللہ ہر شے کا جاننے والا ہے ﴿١١﴾اور اطاعت کرو اللہ اور اس کے رسول کی پس اگر روگردانی کرو گے تو نہیں ہے ہمارے رسول پر مگر واضح طور پر پہنچا دینا ﴿١٢﴾اللہ وہ ہے جس کے سوا کوئی معبود نہیں اور اللہ پر ہی مومنوں کو توکل کرنا چاہیے ﴿١٣﴾اے وہ لوگ جو ایمان لائے جو تحقیق تمہاری بیویوں اور اولادوں میں سے بعض تمہارے دشمن ہیں ان سے بچو اور اگر تم معاف کردو اور درگزر کرو اور بخش دو تو تحقیق اللہ بخشنے والا مہربان ہے ﴿١٤﴾سوائے اس کے نہیں تمہارے مال اور اولادیں آزمائش ہیں اور اللہ کے نزدیک بڑا اجر ہے ﴿١٥﴾پس اللہ سے ڈرو جس قدر تمہاری طاقت ہو اور سُنو اور اطاعت کرو اور خرچ کرو (اور قصد کرو) نیکی کا اپنے لئے اور جو نفس کے بخل سے بچایا جائے پس ایسے لوگ ہی چھٹکارا پانے والے ہیں ﴿١٦﴾اگر تم اللہ کو قرض حسن دو تو اس کو تمہارے لئے دوگنا کردے گا اور تمہیں بخش دے گا اور اللہ شکر کی جزا دینے والا حلیم ہے ﴿١٧﴾غیب اور شہادت کے جاننے والا غالب دانا ہے ﴿١٨﴾

بروایت محمد بن فضیل امام موسی کاظم علیہ السلام سے منقول ہے کہ یریدون لیطفئو ا نور اللہ میں نور سے مراد حضرت امیر علیہ السلام کی ولایت ہے اور واللہ متم نورہ میں بھی نور سے مراد امامت ہے اور اس جگہ نور سے مراد امام ہے تفسیر مجمع البیان میں نور سے مراد قرآن مجید لیا گیاہے اور امام و قرآ ن چونکہ ایک دوسرے سے جدا نہیں ہوتے لہذا دونو ں توجہیں درست ہیں۔

التغابن غبن سے ہے جس کا معنی ہے نفع اگر تجارت میں کسی کو نفع پہنچے تو اس کو غابن کہتے ہیں او ر اگر نقصان پہنچے تو اس کو مغبون کہتے ہیں پس قیامت کے روز مومن اپنی دنیاوی قربانیوں کی وجہ سے نعمات جنت حاصل کرے گا تو وہ غابن ٹھہرے گا اور اس کے برعکس جو شخص اپنی دنیاوی لذتوں میں کھو کر جنت سے دست کشی کرنے پر مجبور ہو گا اور جہنم کا مستحق ہوگا تو وہ مغبون ہوگا اسی مناسبت سےقیامت کو یوم التغابین کہاگیاہے کہ وہ دن غابن اور مغبون کے نتیجے کا دن ہے اور منقول ہے کہ ہرشخص کے لئے جنت اور جہنم میں ٹھکانے موجود ہیں پس جنتی کو اس کا جہنمی ٹھکانا بھی دکھایا جائے گا اور کہا جائے گا کہ اگر تیرا ایمان وعمل نہ ہوتا تو تجھے وہ ٹھکانا نصیب ہوتا پس اس کی خوشی میں اضافہ ہوگا اور اللہ کا شکر کرے گا اور کافر کوجنت کا ٹھکانا دکھایا جائے گا اور کہا جائے گا کہ اگر تونے نیک اعمال کئے ہوتے تو تجھے یہ ٹھکانا ملتا پس اس کی حسرتوں میں اضافہ ہوگا۔

اس میں شک نہیں کہ مال اور اولاد انسان کے لئے بہت بڑی آزمائش کامقام ہیں کیونکہ ان کی بدولت انسان دنیاوی امور میں مبتلا ہو کر آخرت سے ہاتھ دھو بیٹھتا ہے اوربعض اوقات ان کی وجہ سے ناقابل عفو گناہوں میں پھنس جاتاہے پس دعا ہے کہ خداوند کریم ہمیں مال و اولاد کے ساتھ استقامت بخشے اور خدا مال ایسا دےجو راہ خدا میں خرچ ہو اور اولاد ایسی دے جو اطاعت پروردگار میں ممدو معاون ثابت ہوں کیونکہ جس طرح بد اولاد والدین کے لئے بعض اوقات جنت سے روکاوٹ کاباعث بنتی ہے اسی طرح نیک اولاد اپنے ماں باپ کے لئے دوزخ سے بچانے کا ذریعہ بن جایا کرتی ہیں۔

پس اللہ سے ڈرو جس قدر تمہاری طاقت ہو او سنو اور اطاعت کرو او ر خرچ کرو (اور قصد کرو) نیکی کا اپنے لئےاور جونفس کے بخل سے بچایا جائے پس ایسے لوگ ہی چھٹکارا پانے والے ہیں۔

امام موسی کاظم علیہ السلام نے فرمایا کہ بخیل وہ ہے جو واجبات کی ادائیگی سے پہلو تہی کرے۔

امام محمد باقر علیہ السلام سے مروی ہے حضرت نبی کریم نے فرمایا جو شخص زکوۃ مفروضہ ادا کرے اور قومی سطح پر خرچ کر ے وہ بخیل نہیں ہے بخیل وہ ہے جو زکوۃ واجبہ بھی ادا نہ کرے اور قوم کی ضروریات پر بھی خرچ نہ کرے لیکن اس کے علاوہ فضول کاموں پر خرچ کرے۔

امام جعفر صادق علیہ السلام سے منقول ہے کہ شحیح بخیل سے بھی بدتر ہے کیونکہ بخیل وہ ہے جو اپنے پیسے میں بخل کرے اور شحیح وہ ہے جو لوگوں کے جیب میں پیسہ نہ دیکھ سکے بلکہ حلا ل یا حرام طریقہ سےاس کو حاصل کرنے کی کوشش کرے۔

امام حسن مجتبی علیہ السلام نے فرمایا شحیح وہ ہے جو پیسہ کو شرف سمجھے اور خرچ کرنے کو تاوان سمجھے۔

امام جعفر صادق علیہ السلام نےفرمایا شحیح وہ ہے جو جائز خرچ سے گریز کرے اور ناجائز خرچ میں دریا دلی کا مظاہرہ کرے۔

جناب رسالتمآبﷺ سے منقول ہے بخیل وہ ہے جو میرا نام سن کر درود شریف نہ پڑھے اللھم صل علی محمد وآل محمد اور بعضوں نے کہا ہے کہ بخیل وہ ہے جو خود کھائے اور دوسروں پر بخل کرے او رشحیح وہ ہے جو دوسرے خرچ کرنیوالوں کے خرچ کرنے کو بھی ناپسند کرے اور ان دونوں سے بدتر لئیم جو کمایا ہو ا مال نہ خود کھائے اور نہ دوسروں کو کھانے دے۔

میرے والد ماجد جو اس دینی درس گاہ کے حقیقی بانی تھے اسی سال 14 ماہ مبارک رمضان 397 کو وفات پاگئے قارئین کرام سے ان کے لیے سورہ فاتحہ کی استدعا ہے۔